LXII
Tresvait la noit, e apert la clere albe.
Li Emperere mult fièrement chevalchet,
Parmi cele ost funt il suner mil graisles.
" Seignurs baruns, » dist l’ emperere Carles,
« Veez les porz e les destreiz passages :
« Kar me jugiez ki iert en rere-guarde. »
Guenes respunt : « Rollanz, cist miens fillastre,
« N’avez barun de si grant vasselage.
« La nostre gent derere en iert plus salve. »
Quant l’ ot li Reis, fièrement le reguardet ;
Si li ad dit : « Vus estes vifs diables :
« El’ cors vus est entrée mortel rage.
« E ki serat devant mei en l’anz-guarde ? »
Guenes respunt : « Ogiers de Danemarche.
« N’avez barun ki mielz de lui la facet. »Aoi.
LXIII
Li quens Rollanz, quant il s’oït jugier,
Dunc ad parlet à lei de chevalier :
« Sire parastre, mult vus dei aveir chier ;
« La rere-guarde avez sur mei jugiet ;
« N’i perdrat Carles, li reis ki France tient,
« Mien escientre, palefreid ne destrier,
« Ne mul ne mule qu’hum deiet chevalchier,
« Ne n’i perdrat ne runcin ne sumier,
« Que as espées ne seit einz eslegiet. »
Guenes respunt : « Veir dites, jo l’ sai bien."Aoi.
LXIV
Quant ot Rollanz qu’il iert en rere-guarde ;
Iréement parlat à sun parastre :
« Ahi, culvert ! malvais hum de put aire ;
« Quidas li guanz me caïst en la place,
« Cum fist à tei li bastuns devant Carle ! » Aoi.
