Sunenl cil graisle e derere e devant
E tuit racatent encontre l’Olifant.
Li Emperere chevalchet iréement,
E li Franceis curuçus e dolent ;
N’i ad celui ne plurt e se dement,
E preient Deu que guarisset Rollant
Jusque il viengent el’ camp cumunement :
Ensembl’od lui i ferrunt veirement.
De ço qui calt ? Kar ne lur valt nient :
Demurent trop, n’i poedent estre à tens.Aoi.
CLXIII
Par grant irur chevalchet Carlemagnes ;
Desur sa brunie li gist sa barbe blanche.
Puignent ad ait tuit li barun de France ;
N’i ad icel ki ne demeint irance
Que il ne sunt à Rollant le catanie,
Ki se cumbat as Sarrazins d’Espaigne.
S’il est bleciez, ne quid qu’ anme i remaignet.
Deus ! quels seisante i ad en sa cumpaigne !
Unkes meillurs n’en ont reis ne catanies.Aoi.
CLXIV
Carles chevalchet tant cume li port durent,
E si clemeinet tel doel e tel rancure.
Ço dist li Reis : « Seinte Marie, aïue.
« Par Guenelun grant peine m’est creüe.
« En vieille geste est mis en escriture :
« Si anceisur encriesme felun furent,
« E felunie ourent tuit en custume.
« El’ Capitolie, à Rume, en firent une :
« Le vieil César ocirent-il par murdre.
" Pois, orent-il malvaise sepouture
« Qu’en fou ardent e anguissus mururent.
" Icist traître si est de lur nature.
