Le cheval brochet des esperuns aguz ;
Laschet la resne, vers Espaigne s’en fuit,
E tel vint milie s’en vunt derere lui.
N’i ad celui k’ el’ cors ne seit feruz.
Dist l’uns à l’altre : « Li niés Carle ad vencut. »Aoi.
CLXX
De ço qui calt ? se fuiz s’en est Marsilies,
Reniés i est sis uncles l’Algalifes
Ki tint Kartagene, Alferne, Garmalie
E Ethiope. une tere maldite ;
La neire gent en ad en sa baillie.
Granz unt les nés e lées les orilles,
E sunt ensemble plus de cinquante milie.
Icil chevalchent fièrement e ad ire ;
Pois, si escrient l’enseigne paienie.
Ço dist Rollanz : « Ci recevrum martirie
« E or sai bien n’avum guaires à vivre ;
« Mais tut seit felki chier ne s’ vendrat primes !
« Ferez, seignurs, des espées furbies :
" Si calengiez e voz morz e voz vies,
" Que dulce France par nus ne seit hunie !
« Quant en cest camp viendrat Carles mis sire,
« De Sarrazins verrat tel discipline"
« Cuntre un des noz en œuverat morz quinze :
« Ne laisserat que ne nus beneïet. »Aoi.
MORT D’OLIVIER
CLXXI
Quant Rollanz voit la contredite gent,
Ki plus sunt neir que nen est arrement,
Ne n’unt de blanc ne mais que sul les denz,
