« Mien escientre, tu n’les mie des noz ! »
Tient l’olifant qu’ unkes perdre ne volt,
Si l’ fiert en l’helme ki gemmez fut ad or,
Fruisset l’acier e la teste e les os,
Ambsdous les oilz de l’ chief li ad mis fors,
Jus à ses piez si l’ad tresturnet mort- ;
Après, li dit : « Culverz, cura fus si os
« Que me saisis, né à dreit né à tort ?
« Ne l’orrat hum ne t’en tienget pur fol.
« Fenduz en est mis olifant el’ gros,
« Ça jus en est li cristals e li ors. » Aoi.
CCI
Ço sent Rollanz que la mort si l’arguet,
Met sei sur piez, quanqu’il poet s’esvertuet ;
De sur. visage la culur ad perdue.
Tient Durendal s’ espée iule nue :
Dedevant lui ad une pierre brune ;
Dis colps i fiert par doel e par. rancure :
Cruist li aciers, ne freint ne ne s’esgruniet ;
E dist li Quens : « Seinte Marie, aïue !
« E ! Durendal, bone, si mare fustes !
« Quant jo me part de vus, n’en ai meins cure.
« Tantes batailles en camp en ai vencues
« E tantes teres larges escumbatues,
« Que Carles tient, ki la barbe ad canue !
« Ne vus ait hum ki pur altre s’en fuiet !
« A mun vivant ne me serez tolue,
« Mult bons vassals vus ad lung tens tenue :
« Jamais n’iert tels en France l’asolue. » Aoi.
CCII
Rollanz ferit el’ perrun de sartanie.
Cruist li aciers, ne briset ne n’esgraniet.
Quant il ço vit que n’en pout mie fraindre,
A sei meïsme la cumencet à plaindre :
