CCXXVI
Dist Clariens : « Dame, ne parlez tant.
« Message sumes à l’ paien Baligant.
« Marsiliun, ço dist, sera guarant :
« Si l’en enveiet sun bastun e sun guant.
« En Sebre avum quatre milie calanz,
« Eschiez e barges e galies curanz ;
« Drodmunz i ad ne vus sai dire quanz.
« Li Amiralz est riches e poissant,
« En France irat Carlemagne querant :
« Rendre le quidet o mort o recreant. »
Dist Bramimunde : « Mar en irat itant.
« Plus près d’ici purrez œuver les Francs ;
« En ceste tere unt estet ja set anz.
« Li Emperere est ber e cumbatant,
« Mielz voelt murir que ja fuiet de camp,
« Suz ciel n’ad rei qu’il prist à un enfant.
« Carles ne dutet hume ki seit vivant. »Aoi.
CCXXVII
« — Laissiez ç’ ester, » dist Marsilies li reis.
Dist as messages : « Seignurs, parlez à mei.
« la veez vus que à mort sui destreiz.
« Jo si nen ai fllz ne filie ne heir ;
« Un en aveie : cil fut ocis hier seir.
« Mun seignur dites qu’il me vienget vedeir.
« Li Amiralz ad en Espaigne dreit :
« Quite li cleim, se il la voelt aveir ;
« Pois, la défendet encontre les Franceis.
« Vers Carlemagne li durrai bon cunseill :
« Cunquis l’avrat d’hoi cest jur en un meis.
« De Sarraguce les clefs li portereiz.
« Pois ço li dites, n’en irat, s’il me creit. »
«E cil respundent : ce Sire, vus dites veir. » Aoi.
