Prent de la carn grant pleine palme e plus :
Iloec endreit remeint li os tut nuz.
Caries cancelet, pur poi qu’il n’est caüz,
Mais Deus ne voelt qu’il seit morz ne vencuz.
3610 Seinz Gabriel est repairiez à lui ;
Si li demandet : « Reis magnes, que fais-tu ? »Aoi.
CCXCII
Quant Carles oït la seinte voiz de l’angle,
Nen ad poür ne de murir dutance :
Repairet lui vigur e remembrance.
3615 Fiert l’Amiraill de l’espée de France :
L’helme li freint ù les gemmes reflambent,
Trenchet la teste pur la cervele espandre,
E tut le vis tresqu’en la barbe blanche,
Que mort l’abat seinz nule recuvrance ;
3620 « Munjoie ! » escriet pur la reconoisance.
A icest mot venuz i est dux Naimes,
Prent Tencendur, muntet i li reis magnes.
Paien s’en turnent, Deus voelt qu’il n’i remainent.
Or, unt Franceis iço que il demandent.Aoi.
CCXCIII
3625 Paien s’en fuient, cum damnes Deus le voelt ;
Encalcent Franc e l’Emperere avoec.
Ço dist li Reis : « Seignurs, vengiez voz doels.
« Si esclargiez voz talenz e voz coers ;
« Kar hoi matin vus vi plurer des oilz. »
3630 Respundent Franc : « Sire, ço nus estoet. »
Cascuns i fiert tant granz colps cum il poet ;
Poi s’en estoerstrent d’icels ki sunt iloec. Aoi.
