« Vengiez m’en sui, mais n’i ad traïsun. »
Respundent Franc : « A cunseill en irum. » Aoi.
CCCIV
3780 Quant Guenes veit que sis granz plaiz cumencet,
De ses parenz ensemble od lui ont trente ;
Un en i ad à qui li altre entendent :
C’ est Pinabels de F castel de Sorence.
Bien set parler e dreite raisun rendre,
3785 Vassals est bons pur ses armes défendre.
Ço li dist Guenes : « En vus ai-jo fiance :
« Getez mei hoi de mort e de calenge. »
Dist Pinabels : « Vus serez guariz sempres.
« N’i ad Franceis ki vus juget à pendre,
3790 « U l’Emperere noz dous cors en asemblet,
« A l’ brant d’acier que jo ne l’ en desmente. »
Guenes li quens à ses piez se présentet.Aoi.
CCCV
Baivier e Saisne sunt alet à cunseill,
E Peitevin e Norman e Franceis ;
3795 Asez i ad Alemans e Tiedeis.
Icil d’Alverne i sunt li plus curteis ;
Pur Pinabel se cuntienent plus queit.
Dist l’uns à l’altre : « Bien fait à remaneir.
« Laissum le plait, e si preium le Rei
3800 " Que Guenelun cleimt quite ceste feiz ;
« Pois, si li servet par amur e par feid.
« Morz est Rollanz, jamais ne l’ reverreiz ;
« N’iert recuvrez pur or ne pur aveir.
« Mult sereit fols ki ja s’en cumbatreit. »
3805 Nen i ad cet ne l’ graant e otreit,
Fors sul Tierri, le frère dans Gefreid,
Aoi.
