Orig. — Arch. de M. le comte H. C. de Meslon. Envoi de M. le secrétaire général du département de la Gironde.
À MONSR DE MESLON,
Monsr de Melon, Je vous advise que j’ay faict tout ce que j’ay peu, avecques mons’ le mareschal de Matignon, pour obtenir pour les garnisons des villes de seureté le bois et chandelle necessaires à la garde d’icelles, et mesmes pour la ville de Pemyrol, à l’instante poursuite des consulz et habitans. Mais il ne m’a esté possible de rien obtenir de luy, disant qu’il n’avoyt pouvoyr d’en ordonner ; que toutesfois il en escriroit au Roy, afin que il luy pleust luy permectre la cotisation et levée de vingt cinq livres par moys sur les dictes villes pour cest effect, suyvant certaine ordonnance que Monsieur en feist, estant de par deçà : tellement que il fault attendre sur ce la volonté et intention du Roy. Cependant je suis d’advis que vous advisiez avec les consulz aux moïens qu’il y aura d’y fournir et satisfaire, avec le support et soulaigement desdictz habitans, et sans leur donner occasion d’en crier et se plaindre, trouvant fort estrange que la court de parlement permette d’un cousté une chose qu’elle deffend de l’aultre. Qui ne sera pas sans le faire entendre au dict sr mareschal, comme aussi j’ay prié le sr de Fabas de luy en escrire. Et asseurez-vous que j’en advertiray le dict seigneur Roy, estant bien marry que je n’y aye pu faire aultre chose. Je vous prie neantmoins faire en sorte que cela n’empesche point qu’il ne soit pourveu soigneusement à la garde de la ville[1] qu’avez en charge, par les moyens les plus convenables dont vous pouvez vous adviser pour eviter tout malheur et inconvenient qui y pourroyt advenir, à faulte de ce, et mesmes en ce temps plein de menées et pratiques pernicieuses, où on ne regarde que
- ↑ Le texte envoyé de Bordeaux donne ici les mots : qu’aucun on charge.
