barques chargées de toute sorte de munitions qu’on portoit en l’armée de Vostre Majesté estant devant la dicte ville, et se seroit trouvé à la mort d’un marchand de Bourdeaulx qui revenoit de vendre des bleds en la dicte armée, ainsi qu’il appert clairement par les informations qui en ont esté faictes par les parens du dict deffunct, qui sont cas couvertz par les edictz et conferences. Et neanmoings le dict Deslax est tellement poursuivy qu’il a esté arresté prisonnier en la dicte ville de La Rochelle. Et pour ce que telles recherches et poursuittes qui se font soubz pretexte de justice sont à present fort communes et ordinaires, combien qu’elles soient directement contre vos edictz et conferences, et l’abolition qu’il a pleu à Vostre Majesté accorder, et que plusieurs juges estiment faire le debvoir de leur charge quant ilz travaillent voz subjectz de la religion reformée, il vous plaira, Monseigneur, commander que le dit Deslax ne soit vexé ne travaillé au préjudice de vos edictz, conferences et abolition, attendu que ce sont [cas] aboliz et esteintz par vos edictz, et dont par iceulx il est entierement deschargé et par l’adveu qu’il en a obtenu, et qu’il n’est aulcunement de ceux qui sont turbulens ne chargez de crimes et malefices ; mais au contraire il est en bonne reputation des gens de bien et paisibles, ayant porté les armes pour le party duquel il estoit ; joinct qu’il est mon serviteur domestique, et officier. Et je m’en ressentiray de plus en plus obligé à la bonté de Vostre Majesté, laquelle je supplye Nostre Seigneur vouloir,
Monseigneur, conserver longuement et heureusement en tres parfaicte santé. Du Mont de Marsan, le xxxje jour de decembre 1583.
et serviteur,
