pretention en ce choix, que de faire des amis, en choisissant des grands qui ne les regarderont iamais, bien loing de veiller sur eux & les instruire par eux, ou par autres, & bien souuent ils prient des personnes qui ignorent mesme Les principes de la Doctrine Chrestienne. Il ne reste donc plus qu’vne voye, pour l’education spirituelle des enfans, à sçauoir celle des petites Escoles, desquelles le grand Gerson Chancelier de Paris auoit vn si grand soin en son temps, qu’il prenoit la peine luy mesme d’instruire les enfans, des choses necessaires à leur salut. C’est le dessein du present traitté, dans lequel vous verrés vne methode asses facile pour instruire Chrestiennement la ieunesse. Il est diuisé en trois Parties, en la premere vous y verrés les qualités d’vn bon Maistre d’Escole, les circonstances des lieux & ameublements necessaires, & les conditions des enfans qu’on doit receuoir. La seconde contient les enseignements de la Pieté ; en Theorie, dans les Catechismes de diuerses especes, & en Practique par l’assistance aux offices diuins, Processions & aux Prieres de l’Escole. La derniere contient la methode de la science, à sçauoir pour enseigner à lire, escrire, compter, getter, & les principes du Latin & du Grec, qui se concluera par deux Chapitres de la Pratique & iournal de l’Escole, Ce traitté pourra seruir aux Maistres des garçons & aux Maistresses des filles. Au reste, ie coniure tous ceux qui liront cette Preface, de considerer attentiuement l’estat present de la mauuaise education des enfans, qui est la cause de la corruption presque generale qui se voit en vous les estats ; or pour remedier à vn si grand mal, chacun auouëra qu’il n’y a point d’autre moyen que de dresser des petites Escoles, où les enfans soient esleués Chrestiennement. C’est pourquoy il seroit à souhaitter que tous
