| DE MAHOMET. | 461 |
doute de la reſurrection, & d’eſtre aſſemblez devant luy pour eſtre jugez, certainement Dieu ſçait tout.
LE CHAPITRE DU CONSEIL,
contenant cinquante-trois verſets,
eſcrit à la Meque.
U Nom de Dieu clement & miſericordieux. Dieu eſt Prudent, Sage, Mageſtueux, il entend tout, il eſt tout-Puiſſant, Dieu t’a envoyé les meſmes inſpirations qu’il a envoyé à ceux qui t'ont precedé, il eſt tout-Puiſſant & Sage, tout ce qui eſt au Ciel & en la Terre eſt a luy, il eſt tout-Puiſſant & ſçait tout, les Cieux s’ouvrent par ſon commandement, les Anges exaltent ſa gloire, & luy demandent pardon pour ceux qui ſont en Terre, il eſt miſericordieux, il voit ceux qui invoquent les Idoles, il les cognoit tous, mais tu n'és pas leur tuteur ; Nous t’avons inſpiré l’Alcoran en langue Arabeſque, pour preſcher les habitans de la Meque, & ceux qui habitent a l’entour de cette ville, nous t’avons envoyé pour leur preſcher le jour du Jugement, il n'y a point de doute qu’une partie des hommes ſera ſauveé, & que l’autre ſera damnée, ſi Dieu euſt voulu, il les auroit creés d’une meſme Religion, il donne ſa grace à qui bon luy ſemble, & les infidelles ſeront privez de ſecours, parce qu’ils ont demandé la
