| 474 | L’ALCORAN. |
Seigneur du Ciel & de la Terre, & de tout ce qui eſt entr’eux, croyez en ſa toute-Puiſſance. Il n’y a point de Dieu que luy, il donne la vie & la mort à qui bon luy ſemble, il eſt voſtre Seigneur, le Seigneur de vos peres & de vos predeceſſeurs, les impies ſe mocquent de ce diſcours, mais le jour du Jugement les attend, ce jour le Ciel ſemblera de la fumée qui couvrira le monde; ce jour le peuple dira, voicy des tourmens douloureux, Seigneur delivre-nous de cette miſere nous croirons en ta loy : Leur converſion ſera inutile, parce que quand le Prophete les a preſchés, ils ſe ſont mocqués de ſes paroles, & ont dit qu’il eſtoit un maiſtre fol, & lors qu’ils ont eſté ſoulagez en terre; ils ſont retournez en leur impieté : Souviens-toy -du jour qu’ils eſté-ont vaincus, & pris par force, & que nous nous ſommes vengés de leur impieté. Nous avons cy-devant eſprouvé les gens de Pharaon, mon Prophete bien aymé leur a preſché mes commandemens, & a dit, Venez ſuivez-moy, ô ſerviteurs de Dieu, je ſuis fidelle Meſſager de ſa divine Majeſté, ne vous eſlevez pas contre ſa loy, je vous enſeigneray ſes commandemens, il me gardera de voſtre colere, il me preſervera d’eſtre lapidé ; ſi vous ne me voulez pas croire, eſloignez vous de moy. Il pria ſon Seigneur lors qu’il cogneut que ce peuple eſtoit infidelle & meſchant. Dieu luy dit, ſors la nuit de la ville avec mes ſerviteurs, ſi les gens de Pharaon te pourſuivent, entre dedans la mer par un chemin large & ſpacieux, tes ennemis qui te ſuivront ſeront ſub-
