Cette page a été validée par deux contributeurs.
Le Drappier.
Ouy : veez-le là qui ne sonne
Mot ; mais Dieu scet qu’il en pense !
Le Juge.
Puisque vous estes en presence
Vous deux, faites vostre demande.
Le Drappier.
Vecy doncques que luy demande,
Monseigneur. Il est verité
Que, pour Dieu et en charité.
Je l’ay nourry en son enfance ;
Et, quand je vy qu’il eut puissance
D’aller aux champs, pour abregier,
Je le fis estre mon bergier.
Et le mis à garder mes bestes :
Mais, aussi vray comme vous estes
Là assis, monseigneur le juge,
Il en a faict ung tel deluge
De brebis et de mes moutons,
Que sans faulte…
Le Juge.
Or, escoutons :
Estoit-il point vostre aloué ?
