Pythie
Ne dissimulez plus, vous avez vostre sœur.
Mais devrois-je parler avecque tant d’ardeur,
Pour ce donneur d’Eunuque à la mode nouvelle ?
Thaïs
Peut-estre en le donnant l’a-t-il creu plus fidelle.
Pythie
Envoyez-le querir, vous l’entendrez parler.
Thaïs
Comment, s’il vient icy, le pourra-t-on celer ?
Pythie
Quand Thrason le sçaura, vous avez vostre conte.
Thaïs
Je ne sçaurois tromper sans scrupule et sans honte
Qu’on cherche toutefois Phœdrie et son present.
Pythie
Vos gens le trouveront au logis à present.
Dorie aura bien-tost traversé cette ruë.
Scène 4
À l’entendre parler, elle en doit estre cruë ;
Qu’un esclave pourtant se soit fait écouter,
A moins que l’avoir veu, j’ay sujet d’en douter.
Ma sœur fit tousjours cas d’une vertu severe.
Cecy n’est point, d’ailleurs, arrivé sans mystere ;
Phœdrie ou Parmenon m’ont joüé quelque tour.
Mais quoy ! la tromperie est permise en amour :
Je ne dois seulement accuser que Pamphile.
