Phœdrie
Gnaton vous a-t-il dit ?…
Thrason
Ouy, Messieurs, c’est dequoy
Je rends tres-humble grace à vostre Seigneurie.
De ma part si jamais il survient broüillerie,
En pieces aussi-tost je consens d’estre mis ;
Et de l’heureux mal-heur qui nous rend bons amis,
Il ne sera moment que le jour je ne chomme.
Gnaton
Vous ay-je pas bien dit qu’il estoit galant-homme ?
Cherée, à Thrason
Il reste cependant querelle entre nous deux.
Quoy ! vous vouliez tantost en prendre une aux cheveux !
Il faut que je la vange au peril de ma vie.
Thrason
Ah ! ne réveillons point une noise assoupie.
Phœdrie
Il a raison, mon frere, et c’est à contre-temps.
Thrason, à ses Soldats
De l’avantage acquis estans plus que contens,
Soldats, retirons-nous : à vos rangs prenez garde ;
Pour moy, j’auray le soin de mener l’avant-garde.
Chremès
C’est faire en vaillant Chef.
