ses mantiaus fu hermins, de deseure volsus
d’un samit de Palerne vermel ou ver menus ;
li tasiel sunt à pieres, li ors i est parus ;[1]
cauces ot de brun pale et esporons agus.
en riant dist au roi : « tes amis est creus ;
« que ja ne vus faura, tant com durt sa vertus. »
et il fu d’Alixandre liement retenus ;
de tiere à xm hommes, li est ses fius creus.
« sire, cou a dit Sanses, grans biens m’est avenus ;
« encor quit veoir l’eure que Daire ert deceus.
« la tiere en averes et il ert confondus.
« quant escapai de Perse, et j’en sui fors iscus,
« ases fui de ses hommes pour ocire seus,
« par Cesariel[2] le grant m’en vig tous irascus ;
« mais onques par nul homme n’i fuis reconneus.
« la trouvai Nicolas qui est d’ire esmeus ;
« cil remanace Grese a ardoir comme fus,
« por cou que ne l’en est aportes li treus. »
lors respont Alixandres, sens consel de ses drus :
« vus ires à Cesare qui en estes venus
« et dires Nicolas que jou sui ja venus.[3]
« le treu[4] li aporte à tout cm[5] escus ;
« se partans ne l’ vienc querre, à son oes ert perdus.
« mais avant li dires, de par moi, tes salus,
« que j’en serai ocis u il sera vencus,
« ains que ja li treus li soit par moi rendus.
« la bataille li manc o mes armes u nus,
« et cil ki vencus ert, sera rois abatus ;
« ne doit tiere tenir jouenes hom recreus. »
Sanses entent le roi, si monte è l’ bai de pris ;
tant cevauce li ber qu’en Cesare est vertis,
et trouva Nicolas en son palais assis ;
entor lui ot ases demaines et marcis.
son mesage li conte, ne fu mie esbahis :
« Alixandres vus mande, li rois poesteis
« qui de mort vus deffie, ne[6] pas n’est vos amis,
« por cou que de sa tiere aves treu requis.
Page:Lambert li Tors - Li romans d’Alixandre, 1846.djvu/47
Le texte de cette page a été corrigé et est conforme au fac-similé.
19
ENFANCE D’ALIXANDRE.
