Acolez moi, si me besiez,
Or en estes bien éésiez,
Ci n’a qui encuser nos doie,
Renart en demaine grant joie
Et vient avant, si l’a besie.
Hersent a la cuisse haucie
A qui moult plesoit cel ator.
Puis s’est mis Renart el retor
Qui n’a cure de cel bargaigne,
Qu’il crient que Ysengrin ne viengne ;
Mès neporqant ainz qu’il s’en isse
Vient as loviaus, si les conpisse
Si con il ierent arengié :
Si a tout pris et tot mengié,
Et fors gité ce qu’il i trueve,
Tote la viez char et la nueve,
S’es a de lor liz abatuz
Et laidengiez et bien batuz
Autresi con s’il fust lor mestres,
S’es a clamez avostre et questres
Privéement conme celui
Qui ne se doute de nului,
Fors que dame Hersent s’amie
Qui ne l’en descoverra mie.
Les Loviax a lessiez plorant,
Dame Hersent lor vint devant,
Si les a blandiz et proiez :
Enfanz, dist-ele, ne soiez
Page:Le Roman du Renart, 1826, tome 1.djvu/46
Cette page a été validée par deux contributeurs.
