Le texte de cette page a été corrigé et est conforme au fac-similé.
Amours
Aime ma fille car ſans faille
Tu peux aimer ſecretement
En bien et honneur. ne te chaille
Priſee en ſeras haultement
Huchee en tout eſbatement
En grans feſtes et en tournoys
Trop craĩdre ne uault ung tournois
Honte
Craindre en ienneſſe ſe me ſemble
Est ung ſigne bien a priſer
Et ſi doiuent aller enſemble
Ou lon ſe feroit meſpriſer
Ceſt enſeignement ie prins hier
Treſtout ainſi que ie le compte
Tout noble cueur doit craindre honte
Amours
Eſt ce honte deſtre ioyeuſe
Ne de faire les gens ualoir
Sans plus riens deſtre enuieuſe
Car du ſurplus ne peut chaloir
Quant on ſe met en nonchaloir
Ceſt trop fait de laſche courage
Toſt ou tard leſte fait aurage
