Le texte de cette page a été corrigé et est conforme au fac-similé.
Honte
Dangier. enuie. malebouche
Sont tout par tout faulx helequins
Garde que leur fait ne te touche
Car ilz ualent pys que coquins
Pys font que donner les boucquins
Pour ce prens garde a ton affaire
Nully neſt blaſme de bien faire.
Amours
Peche ſeroit de toy blaſmer
Et te mettre uillain chappel
Se les gens te ueulent aimer
Doys tu de ce faire ung appel
Non non ſe ieſtoy en ta pel
La uoudroye ie condeſcendre
Amours fit dieu du ciel deſcendre
Honte
Lamour de dieu et la mondaine
Ne ſe mettent point en ung compte
Lune eſt bonne lautre eſt fredaine
Lune paye lautre meſconte
Ceulx qui ueulent narrer ce compte
Se coeuurent bien dun ſac moille
Beau drap ne doit eſtre ſoille
