Le texte de cette page a été corrigé et est conforme au fac-similé.
Entor ay ie denier et maille
quonques ne virent pere ni mere
Le Drappier
Dieu en ſoit loue Par ſaint pere
il ne men deplairoit en piéce
Pathelin
Bref, ie ſuis gros de ceſte piece
il men conuient auoir
Le Drappier
Or bien
Il couuient aduiſer combien
vous en voulez premierement
tout eſt a votre commandement
quanque il en y a en la pille
et neuſſiez vous ne croix ne pille
Pathelin
Je le ſcay bien voſtre mercy
Le Drappier
Voulez vous de ce pers clercy
Pathelin
Auant combien me couſtera
la premiere aulne. dieu ſera
paye des premiers ceſt rayſon
vecy ung denier. ne faiſons
rien qui ſoit ou dieu ne ſe nomme
Le Drappier