Page:Marco Polo - Le Devisement du monde, 1556.djvu/28

Cette page a été validée par deux contributeurs.

Du retour des deux freres vers le grand Roy
des Tartares.         Chap. VI.

Deux ans estoient desja passez que les deux freres estoient retournez en leur pays, qu'ilz s'adviserent que le grand Empereur des Tartares attendoit leur retour. A ceste cause craignans qu'il se faschast de leur longue demeure, partirent de Venise & retournerent à Ancone vers le Legat, menans avec eulx le jeune Marc Paule pour leur faire compaignie en ce lointain voyage. Et apres avoir retiré du Legat lettres pour porter à l'Empereur des Tartares, par lesquelles estoient amplement deduictz & remonstrez les poinctz principaulx concernans la foy catholique, se delibererent de rechef retourner au pays oriental, mais ilz ne furent gueres eslongnez d'Ancone, que de la part des Cardinaulx arriverent les courriers vers le Legat, pour l'advertir qu'il avoit esté esleu Pape & souverain evesque de Rome, qui depuis fut appellé Gregoire dixiesme du nom.Gregoire, lequel ces nouvelles oyes incontinent envoya gens apres les deux freres Venetiens pour les faire retourner, les admonnestant de ne partir que premierement ilz ne portassent autres lettres au grant seigneur de Tartarie. Ce qu'ilz firent, & leur bailla pour leur faire compaignie deux religieux freres predicateurs, gens doctes & de bonne vie, l'un desquelz estoit nommé Nicolas, l'autre Guillaume Tripolitain, lesquelz demouroient lors à Ancone. Ainsi partirent ensemblement