Page:Montaiglon - Recueil général et complet des fabliaux des 13e et 14e siècles, tome IV.djvu/106

Mès je pris moût poi ton savoir,
Quant tu braies ne pues avoir :
Vers toi mauvesement te prueves.
— Si ai, » fet il, trestoutes nueves,
Dont j’emblai l’autre jor la toile ;
Et m’en vienent jusqu’à l’ortoile.
— Li tijuel issi sont il lonc,
Sire ? quar les nous moustrez donc, »
Fet Baras, « et si les verrons. »
Haimès soulieve ses girons :
De ses braies nules ne vit,
Ainz vit ses coilles et son vit
Trestout descouvert nu à nu :
« Dieus, » fet il, « que m’est avenu ?
Por le cul Dieu où sont mes braies ?
— Je ne cuit pas que tu les aies,
Biaus compains, » ce li dist Travers ;
« N’a tel larron jusqu’à Nevers
Comme est Baras, si con moi samble.
Bien est lerres qui larron emble ;
Mès je n’ai avoec vous mestier,
Quar je n’ai de vostre mestier
Vaillant .iiii. deniers apris ;
Teus .c. foiz seroie je pris.
Que vous eschaperiez par guile.
Je m’ent irai à nostre vile,
Là où j’ai ma famé espousée.
Folie avoie ore en penssée,
Qui voloie devenir lerres ;
Je ne sui fols ne tremelerres.