Ceux par dehors morts de faim profligez,
En plus grand faim que iamais seront mis.
LXXII.
Le bon vieillard tout vif enseuely,
Pres du grand fleuue par fausse soupçon :
Le nouueau vieux de richesse ennobly,
Prins à chemin tout l’or de la rançon.
LXXIII.
Quand dans le regne paruiendra le boiteux,
Competiteur aura proche bastard :
Luy & le regne viendront si fort roigneux,
Qu’ains qu’il guerisse son faict sera bien tard.
LXXIV.
Naples, Florence, Fauence[1], & Imole,
Seront en termes de telle facherie,
Que pour complaire aux malheureux de Nolle[2]
Plainct d’auoir faict à son chef moquerie.
LXXV.
Pau, Vérone, Vicenne[3] Sarragousse,
De glaiues loings, terroirs de sang humides
Peste si grande viendra à la grand gousse,
Proche secours, & bien loing les remedes.
LXXVI.
En Germanie naistront diuerses sectes,
S’approchant fort de l’heureux paganisme,
Le cœur captif & petites receptes,
Feront retour à payer le vray disme.
LXXVII.
Le tiers climat sous Aries comprins
L’an mil sept cens vingt & sept en Octobre,