PREFACE.
E petit œuvre Intitulé Antiparadoxe,
Pource qu’il est escript contre
le Paradoxe du vinaigre, nous avons
mis en Dialogue, tant pour eviter
ennuy au lecteur : que pour inspirer
vie a la parolle. Car propos entrecouppez faschent
moins, & recréent plus le lecteur, que l’oraison continuelle,
tousjours à elle mesme semblable, & plus vive
est l’interlocution de deux, ou de plusieurs, que l’on represente
quasi vifz, & parlans, que le languide discours
d’ung seul parlant sans reclame. Et affin que l’on ne
nous puisse reprocher, (ce que faict Barptolemæus Scala,
à Politian, que nous sommes Hercules contrefaictz
qui nous forgeons des monstres à plaisir, si foibles que facilement
les puissions desfaire. Sache le lecteur que nous
n’avons rien attribue à la persone de Paradoxoleros,
que luy n’ayt escript en son livre. Et qui plus est l’avons
introduict trop mieulx parlant, & argumentant qu’il
ne faict, & de faict, comme vraiz champions, avons baille à
nostre adversaire concertateur, meilleures armes que
les siennes propres, comme assez le pourra cognoistre
quiconque aura leu l’ung, & l’autre. Nous protestons
aussi n’avoir escript cecy par nulle malle affection, sinon
pour purger les Medicins Lyonnoys de suspicion de tel
erreur, qui pourroit sembler estre par eulx approuvée.
Et que ainsi soit n’avons escript aulcune parolle injurieuse
ny touché aulx vices, & mœurs, ou paraventure
matiere ne nous heust defailly,