[An 1198.] L’an de l’incarnation de nostre Seigneur mil cent quatre vingt dix-huict, au temps du pape Innocent III, de Philippes Auguste, roy de France, et de Richard, roy d’Angleterre, il y eut un saint homme en France appellé Foulques, et surnommé de Nueilly parce qu’il estoit curé de ce lieu, qui est un village entre Lagny sur Marne et Paris. Ce Foulques se mit à annoncer la parole de Dieu par la France et les pays circonvoisins, nostre Seigneur operant par lui grand nombre de miracles, tant que la renommée s’en épandit par tout, et vint jusques à la connoissance du Pape, lequel envoya en France vers ce saint homme pour luy enjoindre de prescher la croisade soûs son authorité. Quelque temps aprés il y deputa le cardinal Pierre de Capoüe, qui avoit pris la croix à dessein de s’acheminer en la Terre saincte, pour y inviter les autres à son exemple de faire le mesme, avec charge de publier de la part de Sa Sainteté les pardons et indulgences qu’elle octroyoit à ceux qui se croiseroient, et
