142. La nouvelle de cette prise ayant esté portée à l’empereur Baudoüin, il prit conseil des barons et du duc de Venise, qui furent d’avis que sans differer davantage il eût à se mettre promptement en campagne avec son armée pour conquerir les terres de l’Empire, et laissât Constantinople (qui avoit esté nouvellement prise, et estoit peuplée de Grecs) garnie d’un nombre suffisant de trouppes pour la garder. Suivant le conseil, fut arresté que l’armée marcheroit ; et ceux qui devoient demeurer pour la garde de la ville furent choisis, sçavoir : le comte Louys de Blois et de Chartres, qui estoit encore indisposé, et n’estoit pas entierement guery de sa maladie, le duc de Venise, et Conon de Bethune, qui demeurérent és palais de Blaquerne et de Bucoleon ; Geoffroy, mareschal de Champagne, Miles de Brabans, et Manasses de Lisle, avec leurs gens de guerre, et tous les autres, se préparérent pour accompagner l’Empereur en son voyage.
143. Mais avant que l’Empereur partit de Constantinople, Henry son frere alla devant avec cent bons hommes d’armes de ville en ville ; et à châcune d’icelle où il arrivoit, les habitans venoient soûs l’obeïssance de l’Empereur, et lui faisoient serment de fidelité. Et ainsi donna jusques à Andrinople, ville tres-bonne et riche, où il fut bien reçeu des habitans, qui firent le mesme serment et hommage ; puis s’y logea avec ses trouppes attendant son frere, qui y arriva quelques jours aprés. D’abord que l’empereur Murtzuphle eût avis de la marche de l’armée françoise, il n’oza l’attendre, et s’en alla tousjours fuyant devant elle deux ou trois journées, tant qu’il arriva vers Messy-
