courir la perte de leur reputation ils ne pouvoient s’exempter de donner jusques là ; qu’il falloit donc que chacun avisast à sa conscience, et se mit en bon estat, et qu’en suitte on reglast l’ordre des batailles. Ayans fait une reveuë de leurs forces, ils trouvérent qu’ils avoient environ quatre cens chevaliers au plus. Surquoy ils firent venir les deputez d’Andrinople, auxquels ils demandérent l’estat de l’armée de Jean roy de Bulgarie, et de quel nombre de gens de guerre elle estoit composée. Ils respondirent qu’il avoit bien quarante mille chevaux, sans les gens de pied dont ils ne sçavoit le compte. D’où l’on peut juger combien cette entreprise estoit perilleuse, estant si peu de gens contre une armée si puissante. Le lendemain matin feste de Sainct Jean Baptiste, ils se confessérent et communiérent, et le jour suivant se mirent en campagne en cét ordre : Geoffroy, mareschal de Romanie et de Champagne, et Machaire de Saincte Manehoud commandérent l’avant-garde ; Conon de Bethune conduisit la seconde bataille ; Miles de Brabant la troisiéme ; Payen d’Orleans et Pierre de Braiecuel la quatriéme ; Anseau de Cahieu la cinquiéme ; Baudoüin de Beauvoir la sixiéme ; Hugues de Belines la septiéme ; Henry frere de l’empereur Baudoüin la dernière ; Gautier d’Escornay, et le flamen Thierry de Los qui estoit seneschal, eurent la charge de l’arriére-garde.
226. L’armée marcha en cét ordre l’espace de trois jours avec beaucoup de danger ; car d’un costé ils estoient en petit nombre, et les ennemis qu’ils alloient combatre estoient tres-puissans : d’autre part ils doutoient de la fidelité des Grecs qui s’estoient declarez pour eux depuis peu, ny qu’ils les voulussent aider
