Ensi sejourna l’ost par trois jorz ; et chascun jor alloient gaaingnier li courreor parmi la terre. Et la terre si ére de montaignes et de jorz destroiz. Si i perdoient cil de l’ost de lor courreors qui alloient follement.
253. Au darraien envoia l’emperéres Henris Ansials de Kaeu por garder les courreors ; Eustaices son frere, et Tierris de Flandres son nepveu, et Gautier de Escornai, et Johan de Bliant. Ices quatres batailles allérent garder les courreors, et entrérent dedenz mult forz montaignes. Et quant lor gent orent coru par la terre, et il s’en vourent revenir, si trovérent les destroiz mult forz. Et li Blac del païs se furent assemblé, et assemblérent às aus. Et lor firent mult grant domage, et d’hommes et de chevaus, et furent mult prés d’estre desconfiz, si que par vive force convint les chevaliers descendre a pié, et par l’aide de Dieu s’en revindrent tote voie à l’ost. Mais grant domage orent reçeu ; et lendemain s’en parti l’emperéres Henris, et l’ost des François, et chevauchiérent par lor jornées arriéres, tant que il vindrent à la cité d’Andrenople, et i mistrent la garnison qu’il amenérent de blez et d’autre viande. Et séjorna l’Emperéres en la praerie de forz la ville bien quinze jorz.
254. En cel termine Bonifaces li marchis de Monferrat, qui ére à La Serre que il avoit refermée, fû chevauchiez trosque à Messinople, et la terre se rendi à son commendement. Lors prist ses messages, si les envoia à l’empereor Henri, et li manda que il parleroit à
