lui sor le flum qui cort soz la Capesale ; et il n’avoient mais eu pooir de parler ensemble trosque la terre fu conquise, que il avoit tant de lor anemis intre als, que il ne pooient venir às autres. Et quant l’Emperéres en son conseils oï que li marchis Bonifaces ére à Messinople, si en furent mult lié, et li manda par ses messages arriers que il iroit parler à lui al jor que il i avoit mis. Ensi s’en alla l’Emperéres vers céle part, et laissa Coenon de Betune pour garder la terre d’Andrenople à tot cent chevaliers : et vindrent là, où li jorz fu pris en une mult béle praërie prés de la cité de la Capesale, et vint l’Emperéres d’une part, et li marchis d’autre, et s’asemblérent à mult grant joie, et ne fu mie mervoille, que il ne s’érent mie pieça veu. Et li marchis demanda novelles de sa file l’empereris Agnes ; et on li dist que éle ére grosse d’enfant, et il en fu mult liez et joiant.
255. Lors devint li marchis hom de l’empereor Henri, et tint de lui sa terre, ensi com il avoit esté empereor Baudoin son frere. Lors dona li marchis Bonifaces à Geoffroi de Ville-Hardoin le mareschal de Romenie et de Champaigne la cité de Messinople à totes ses apartenances, ou celi de La Serre, laquelle que il ameroit mielz, et cil en fu ses hom liges, sauve la fealté l’empereor de Constantinople. Et ensi séjornérent par deux jorz en céle praerie à mult grant joie, et distrent depuis que Diex lor avoit doné que il
