Page:Rabelais marty-laveaux 01.djvu/29
De la genealogie & antiquité de Gargantua.
Chapitre Ⅰ.
E vous remectz à la grande chronicque Pantagrueline recongnoiſtre la genealogie & antiquité dont nous eſt venu Gargantua. En icelle vous entendrez plus au long comment les Geands naſquirent en ce monde : & comment d’iceulx par lignes directes yſſit Gargantua, pere de Pantagruel : & ne vous faſchera, ſi pour le preſent ie m’en deporte. Combien que la choſe ſoit telle, que tant plus ſeroit remembree, tant plus elle plairoit à vos Seigneuries : comme vous auez l’autorité de Platon in Philebo & Gorgias, & de Flacce, qui dict eſtre aulcuns propos telz que ceulx cy ſans doubte, qui plus ſont delectables, quand plus ſouuent ſont redictz.
Pleuſt à dieu q’un chaſcun ſceuſt auſſi certainement ſa genealogie, depuis l’arche de Noë iuſques à ceſt eage. Ie penſe que pluſieurs ſont aujourd’huy empereurs, Roys, ducz, princes, & Papes, en la
