navire à belles dentz, et l’avalla toute entière sans mascher, avecq tout ce qui estoit dedans, dont il se trouva fort mal : car à ladicte navire il y avoit plus de cinq cens marmotz et autant de cynges qui luy saultoient dedans le ventre incessamment, de sorte qu’il pensoit avoir les avives. Au moyen dequoy fut contrainct de faire descendre son médecin c’est assavoir ledict housseur et ramonneur de cheminées, dedans son ventre avecq un fouet, lequel les luy fist sortir à grans coups de fouet par le trou de cul, dont les aulcuns se cachèrent à l’ombre du poil qui là estoit, puis en faisant une vesse les jecta tous en la mer.
Comment les coqs, chappons et poullailles chantoient dedans le ventre de Bringuenarilles.
CHAPITRE VII.
Et pource que souventesfois tous les poussins qu’il esclouroit ne sortoient pas tous hors de son ventre, mais demouroient dedans son corps, là où ilz croissoient si grandz, estoient coqs parfaits, parquoy, quant il bailloit, vous eussiez ouy plus de cent mille coqs chanter dedans son ventre, si melodieusement
