Cette page a été validée par deux contributeurs.
Ne sont pendus de malles hars,
Les procez pris dedans ses parcs
I demeureront longuement.
Primus.
Je diz auci pareillement :
S’on fait au vin dans les seliers,
Ceste annee auchun broulement,
Nous y verrons finablement
Beaucoup de mauvez taverniers.
Secundus.
Je diz : s’on seufre aux cordeliers
Ou aux quarmes courir la ville,
Il feront en divers cartiers
Des confusions plus de mille.
L’Astrologue.
Conclusion, c’est de prier
Pour le roy principalement
Que Dieu le gard de varier
Par ce geminal mouvement.
Chascun.
C’est le grant danger vrayement ;
Mès j’ay ja bonne confidence
Au restaurer premierement
Et au nouvel advenement,
Que Dieu y mettra providence.
Le Prince.
Enfans, nous airons patience
Tant que la revolucion
Du cours du temps a l’influence
Aist austre disposicion.
Finis.
