Buer la servi et buer l’ama ;
S’à son besoing la réclama
Ne cuit que pas la trovast sorde ;
Quar n’est douceurs en lui ne sorde.
Que qu’il estoit en si haut pris,
A son évesque est uns maus pris
Dont ne pot estre respassez.
Quant fu du siècle trespassez,
Tuit s’asemblèrent clerc et lai :
S’ont esléu[1] sanz nul délai,
En l’onor Dieu et Nostre-Dame,
Théophilum lor bon vidame ;
Communalment prennent à dire
C’on ne porroit millor eslire,
Ne plus discrez[2] ne plus ydoine.
Théophilus est en angoine
Et esfréez trop durement,
Car il set bien certainement,
Se tel honor prant et embrace,
Vainne gloire, qui maint mal brace[3],
Tost le porra si embracier
Que maint mal li fera bracier.
Ainz tant ne l’en sorent prier,
Dire lor volsist n’otroier[4]
Lor sires fust ne lor évesques.
Lors firent tant que l’arcevesques[5]
Par ses lettres tost le manda
Et durement li commanda[6]
Qu’alast à lui, ne lessast mie,
Et recéust la seingnorie
Que Dieus li avoit envoiée.
N’i ala pas cele foiée,
Mès plus qu’il pot s’en délaia,
Com cil qui moult s’en esmaia.
Quant li puples vit le délai
- ↑ Le Ms. 7987 porte : Esléu ont ; etc.
- ↑ Le Ms. 7987 porte : Secré.
- ↑ Les rimes de ce vers et du suivant, dans le Ms. 6987, sont lace et enlacier.
- ↑ Le Ms. 7987 porte : « Que il lor vausist otroier. »
- ↑ Le Ms. 7987 porte : « Tant fisent à lor arcevesque. »
- ↑ Ce vers n’est pas dans le Ms. du fonds de Saint-Germain.
