Il lor soloit doner l’arjant
Et les solers et les costeilles,
Neis au messiaux et aux meseles
Soloit beissier et piez et mainz.
Téophîllus, c’est or du mains,
A si bestorné son afere
Que tallant n’a de nul bien fère ;
Si se demeinne cointement
Qui n’a mès nul acointement,
A nului tant soit fier ne cointes,
Povre genz et povres acointes,
A-il du tout désacointié.
A l’enemi s’est acointiez,
Qui tant le fet musart et cointes
Que de toz biens se désacointe.
Devant estoit humbles et douz,
Or est cointes, fiers et estouz ;
Devant ert franz et débonaire,
Or est cuiverz[1] et de put aire ;
Devant estoit bons crestiens.
Piteuz et doz et pacienz
Et plains de grant relegion :
Or a toute s’antencion
En vanité et en luxure ;
De nulle annouz n’avoit ainz cure,
Mès or i bée assez et pense ;
Devant soloit fère despense
De toz ces biens à povre gent :
Or amoncelle or et argent
Por lui lever et essaucier ;
Povre gent souloit deschaucier,
Or les boute, fiert et ledenge.
De touz biens fere si s’estrange[2]
Et si bestorne tot son estre,
Ce n’est mès cil qui souloit estre ;
Si lédement est décéuz,
Si trebuchiez est et chéuz
El piège de désespérance ;
En Dieu n’a mès nule espérance[3],
Page:Rutebeuf - Oeuvres complètes, recueillies par Jubinal, tome II, 1839.djvu/295
Le texte de cette page a été corrigé et est conforme au fac-similé.
288
NOTES
