Page:Rutebeuf - Oeuvres complètes, recueillies par Jubinal, tome II, 1839.djvu/311

304

NOTES

De paradis est clés et serre ;
Dame ies en ciel, Dame ies en terre,
Dame ies d’aval, Dame ies d’amont^[1].
Se li déable enginnié m’ont,
Douce Dame, pitié t’en preingne
Et ton douz Fil prier en deingne.
Mes secors ies et ma fiance,
Ma séurtez et m’espérance ;
Mon cuer en toi du tout s’affie.
Douce Dame, seinte Marie,
Douce pucele glorieuse.
Tant ies doce, tant ies piteuse
Que nus de cuer ne te requiert
Que tu ne faces quanqu’il quiert^[2].
Je te requier en grant angoisse :
N’est nus qui ma doulor connoise,
N’est nus qui sache ma tritesce,
N’est nus qui sache ma destresce.
Mon destorbier ne mon afère,
Fors tu, pucele debonère,
Et tes dos filz, le Roi de gloire.
Je t’ai éu en grant mémoire.
Je t’ai anmée durement,
Je t’ai servie longuement ;
Mes ainzsine est que li déables,
Li soudianz, li decevables,
Li agaitanz, li envieus,
Li frunz^[3], li fel, li annuieux,
Par son barat m’a si soupris
Qu’an son laz m’a lacié et pris.
A l’aim m’a pris et à la lingne :
Ne gart l’ore qu’as meins me tiengne,
Ne gart l’ore si me sorprengne
Qu’ensemble enport et cors et âme ;
Haute pucele, haute Dame,
Douce Dame, seinte Marie,
Mon las de cuer, m’âme et ma vie
D’or en avant met en ta garde.
Se ta douçor ne me regarde
Tout ai perdu, et plus et mains :

1. Ms. 6987. Var. Dame es du val, Dame es du mont.
2. Le Ms. 2710 porte : « Luès droit ne faces quanqu’il quiert. »
3. Ms. 2710. Var. Frois.