Page:Rutebeuf - Oeuvres complètes, recueillies par Jubinal, tome II, 1839.djvu/317

310

NOTES

Si com Sainz-Esperiz l’escite,
Qui le r’esprant et fet si haut
Que de sa honte ne li chaut,
Ainz en covoite à boivre assez
Por ce que mielz fust respasez
Du venin dont fu entochiez.
As piez l’évesque s’est couchiez,
Si vomist tost et giete hors
La grant ordure de son cors
Por l’âme faire nete et monde.
A l’évesque et à tout le monde
Apertement dit et descovre
Son meffet et sa vilaine œvre.
Chaucun se seigne et esmerveille
Quant il raconte la merveille
Que li mostra fors de la vile^[1]
Li guilierres par sa grant guile.
Tost li éust guillée s’âme
Se Diex ne fust et Nostre-Dame.
Chaucun plora, chaucun gémi
Quant il lor dit qu’à l’ennemi
Ot fet homage et féauté^[2].
L’évesque r’a tout effréé
Quant la chartre li a mostrée
Que Nostre-Dame ot raportée
D’enfer, où cil l’avoit reposte
Qui mainte âme grailie et rote.

Toz li pueples plore et soupire
Quant Théophillus oent dire^[3]
En quel manière et en quel guise
La mère Dieu par sa franchise
Conseillié l’a et visité.
Voiant tous ceux de la cité
A l’évesques la chartre lite,
Et quant finée fu et dite,
L’évesques, qui fu mult humains,
Envers le ciel tendi ses mains,
A ieuz moilliez glorefia

1. Ce vers et le suivant ne sont point au Ms. 6987.
2. Ms. 2710 La Vallière. Var. Ligée.
3. Ms. 2710 La Vallière. Var. Prent à dire.