Page:Rutebeuf - Oeuvres complètes, recueillies par Jubinal, tome II, 1839.djvu/464

457

ADDITIONS.

devant et derière, et si ont à non cele gent Sanitturi et Sénofali Tygrosopes. En l’autre partie dou désiert avons-nous houmes ki vivent de char crue, ausi d’omme coume de biestes ; et saciés k’il ne doutent à morir : et quant uns des leur muert, soit parens, soit amis, il le menguent, et dient que c’est la mioudre chars qui soit ; et li non de cele gent sont Got et Magot, et Anich, Acherives, Parpho, Ténepi, Gaugamate, Agrimodi. Toutes ces générations et moult d’autres enclost Alixandres, li enfès grans rois de Machidoine, entre les .ij. grans mons de Gos et de Magos, ès parties d’Aquiloine, où nous avons .lxij. castiaus où nous tenons grans garnissons, avoec .i. roi ki est pour nous contre ces gens en une chité ki est apielée Orionde. Et ces générations ne sont mie des fius Ysrael, mais il sont de Gos et de Magos ; et quant nous les volons maitre en bataille, nous les i metons bien ; et quant nous nos volons venghier de nos anemis, il les menguent tous, que nus n’en i remaint ; et quant ils les ont dévourés, si les remetons arière en leur contrées, où nous les avons pris ; car se nous les laisiens entre nous, il dévorroient nos gens et nos biestes, pour voir le sachiés. Et ces mesmes générations n’isteront devant el tans que li siècles devera finer, el tans Antecrist, et lors s’espanderont par toutes tierres ; et saciés que nus n’en poroit tenir conte ne c’on feroit de la graviele de la mer, ne les gens de toutes tieres ne les poroient contrester ; et ce sont les générations dont li prophètes prophetissa. Par leur abbominations ne venront-il jà au jour de l’juise, au jour dou jugement ; car nostre Sire leur envoiera le fu ardent dou ciel, ki tous les ardera : en tel manière seront degasté ; car, pour voir, nès le cendre n’i demoerra à venter. Apriès nous vous dissons qu’en une partie dou