Page:Rutebeuf - Oeuvres complètes, recueillies par Jubinal, tome II, 1839.djvu/468

461

ADDITIONS.

par cele piere est renouvelée la lumière dou monde et la vie ; et ki se porroit baignier en l’aigue de cele fontainne, il revenroit en l’aage de .xxx. ans se il en avoit .c. ou .ij. cens, et cil ki en aroit .xxx. si parmanroit en cel meisme aage tant coume il poroit vivre. Et en toutes les miervelles ki sont est une mierveille en nostre terre ; car il i a une mer de pourre sans aigue, et rent ses ondes ausi con autre mer, et n’est onques en repos, si que nus ne la puet trespasser ; et pour ce ne puet nus om savoir combien nostre tierre est grans, fors nous ki l’avons toute en escrit ; et si avons autre passage par où nous poons toute nostre tiere vissiter. Et entour cele mer dalès le rive, trueve-on moult de medechynes, ki sont boines à boire ; et dalès cele mer keurt uns fluns de pierres précieuses, et keurt cis fluns toute le semainne et ciesse le samedi, et quant il croist, il enporte avant soi granz pieres et petites courans à le manière d’iaue courant ; et quant que il encontre il enporte avant soi courant en la mer areneuse ; et les .ix. lignies d’Ysraël ne puéent trespasser cele mer ne cel flun. Et de l’autre part le mont où cil fluns n’est, avons-nous .xl. castiaus de de piere grans et fors plus que nul ki soient el monde, et de l’un à l’autre n’a que le trait à .i. arbalestre ; et en les garnisons de ces castiaus tenons-nous .iij. mile chevaliers, et .v. cens arbalestriers, et .x. mil arciers, et .xxx. siergans à ceval et à armes, ki gardent les mons ke ne’ s puissent trespasser la lignie d’Ysraël ; que s’il en pooient issir, tous li mons seroit degastés par aus, que por .i. seul castiel que nous avons et pour une forteraice, il en ont .x. ; et sachiés de vérité que pour ces castiaus et pour les despens que nous i metons, li grans rois d’Ysraël nous doune cescuns an .c. soumiers cargiés d’or