entrer ; et bien se gart cil ki i entre qu’il en isse tost, que se il ne se corroit de l’issir, il seroit tantost sourmontés de la pourre ; et cil qui en puet issir, toute la pourre que il en porte est tantost conviertie en pierres précieuses ; mais il ne les osent vendre devant là que nous les aions véues ; et se elles nos plaisent, nous les avons devant tous pour le pris que elles valent. Et en cele tierre nourist-on les enfans en l’iaue, et i demeurent. Apriès nous avons une autre tierre ki dalès le désiert est, où nus n’ose habiter pour la calour. Et en cele tierre naissent vier ki ne puéent vivre fors k’en fu ardant, et sont apielet en nostre langaage salemandras, et si font un piel entour aus ausi coume li vier ki font le soie ; et de ces piaus faissons-nous viestemens as grans dames de nostre tierre, et cil viestement ne se puéent laver ne mais en fu ardant.
Connéue chose soit à vous que nous avons tant de richecce que nus ne puet i estre povres ki viout gaegnier en nostre tierre ; et trestous les pélerins ki vienent à mon signor saint Thumas et as autres sains de nostre tierre faissons-nous riches. Et saciés de voir que Dieux fait moult de miracles pour mon signour saint Thumas, et plus que il ne fait pour nul autre saint de nostre tiere ; car il praiaice corporelment et se liève au jour qu’il fu martiriiés, et fait prédications as gens de la citet où ses cors gist. Et sachiés qu’en nostre tierre n’a nul larron, ne nul convoiteus, ne nus escars home, que Dieux ne les i soufferroit pas, anchois seroit destruis de piesme mort. Et si avons moult buens chevaus, li quel portent bien un chevalier armé .iij. jours entiers sans mengier et sans boire. Ne quidiés pas que nus ki soit, de Gos et en Magos jusqu’en occident, ait tant de rikecce que nous avons, si coume de boines chités et de buens castiaus. Et quant
