et sont grailles par-desus pour iestre plus fors et si est grosse par desous tant coume uns hom puet enclore ennre ses bras par .ij. fois ; et nule riens ne puet chéir el palais ki tantost ne soit trouvés ; et se n’i a ne piertruis ne feniestres, car on i voit assés des escarboucles et des pieres précieuses ki i sont. Et nous tenons court en nostre palais le jor dou Noel, le jour de Pasques, le jour de l’Ascention, le jour de la Nativitet à le boine euirée Virge et le jour de la soie Assumption, et tous ces .vj. jours portons-nous hautement couronne pour le hautaice dou jour ; et demorons en nostre palais, et disons bien, et faissons bien, et faissons prédication au peuple, et nous en isons le soir ; ne nus n’entre el palais, ne mais en ces .vj. jours, fors nous, ki i entrons quant nous volons privéement ; et quant nous en issons nous soumes raempli des très boines oudours, et soumes ausi saol coume se nous aviions assés mangiet de boines viandes ; et .xxx. cevalier françois le gardent de jours et .lx. de nuit, et .c. siergant armé. Et sachiés nous vous avons aconté une partie des miracles et des miervelles de nostre tierre et de nostre court ; mais ne vous avons pas acontées des viertus et des miracles monsignour saint Thumas, et des palais à ses patriarches, ki sont à oïr plus miervelleus que nul ki soient el monde. Que ke nous vos aiiens aconté et dit de nous et de nostre tierre et de nos coses est ausi voirs coume vous creés que nostre Sires soit el ciel, que nous ne vous menterions en nule manière ne de ce ne d’autre cose[1].
- ↑ Le Ms. 7215 ajoute : Ce sachiez bien pour vérité : cil vous gart qui vit et règne et régnera sans fin. Amen.
