Si l’enporte vers la faloise :
Lors de crier pas ne m’achoise
Quant les las meschiez fui veant ;
A paine me sours en séant,
Mès autre chose ne poi fère
Fors souspirer, crier et brère,
Que toute la force oi perdue.
Avarisce Larguesce rue,
Comment qu’il soit aus bons amer,
Jus aval ou flo de la mer,
Et cele, à cui Diex envoi honte,
Ne daigna de moi tenir conte :
Voiant moi tantost s’esperdi,
En sa venue trop perdi
Quant madame Laguesce a morte.
S’Archevesque[1] s’en desconforte,
Quel qu’il fut de son esveillier,
Ne vous en devez merveillier :
Toute i a perdu sa puissance.
Ne set nul lieu sa recouvrance
Fors en son ami le greignor :
C’est de saint Martin le seignor.
Vous qui vostre entente avez mise
D’oïr com Larguesce est occise,
Dont est domage et grant doleur,
Esgardez se l’ dit a coleur,
Comment que il soit véritable,
Et s’il est reson aüable.
- ↑ Ceci est le nom ou le surnom de l’auteur. Les trouvères signaient presque toujours ainsi leurs ouvrages en commençant ou en finissant.
