Cist joste mielz que nus, cist prent bois et chasteax,
Cist est li plus proisiez, cist fait les bons cenbeax. »
Ausi dit-l’on de femes orendroit tout à cors,
Par chasteax, par citez, par viles et par bors :
Ceste a nom Joenneste, ceste a nom Eranbors ;
Ceste a blonz crins pendanz, ceste les a rebors ;
Ceste est de Paris née, ceste est de Vernon,
Cel autre maint à Chartres et ceste à Esparnon,
Cel est de Roam née, cel est de Galardon :
L’en ne fait mais de femes, ce truis, se gaber non.
De la folie as femmes est par tot la parole ;
Chascun s’en gabe, mais chascun en tient parole.
Feme maine la dance, la tresche, la quarrole ;
Ilueques connoist-l’en laquele est la plus fole ;
Quar la feme c’on cuide où il a plus avoir,
Honneur et cortoisie, et proesce et savoir,
C’est cele qui mains valt, ice sachiez de voir.
Nus n’en velt qui n’en ait puis qu’il ait point d’avoir.
Qui vorroit raison faire, l’en devroit, par saint Gile,
Riche feme qui sert de barat et de guile
Et qui por gaaignier vent son cors et avile,
Ausi com .i. mesel chacier fors de la vile.
L’en soloit mult de femes par maintes achoisons
Mestre fors de la vile, c’estoit droiz et raisons.
Or est venuz li tans et or est la saisons
Plus a par tout bordeax que il n’i a maisons.
L’en doit bien povre feme de folie escuser
Qui n’a que une cote que li convient user ;
El ne sert pas de guile de la gent amuser :
Comment puet povre feme son gaaig refuser ?
Page:Rutebeuf - Oeuvres complètes, recueillies par Jubinal, tome II, 1839.djvu/491
Le texte de cette page a été corrigé et est conforme au fac-similé.
484
ADDITIONS.
