Une chose fait feme c’on tient à foloier :
Feme fait à chascun de ses .ij. braz colier ;
Feme ne doit nul home acoler ne baisier
Se ele ne le velt de son cors aesier.
Feme se met en vente : gart soi bien qui l’achate !
(Feme set mult d’enging, de barat et de frape)
Mielz li venroit sanz faille acheter une nate :
Feme sanble .iij. choses : louve, goupille et chate.
Louve, goupille et chate sont .iij. bestes de proie :
Chate cherche, goupil gaite, louve ravit et proie.
Jà feme n’amera, qui que velt si m’en croie,
Nul home s’el n’en a ou robes ou monnoie.
C’est merveille de feme com est de mal affaire,
Quant celui qui plus l’aime bée plus à mal faire ;
Et celui que li fait plus anui et contraire,
Celui aime d’amor et plus le velt atraire.
Feme sanble lion qui sa queue traïne
Por sa trace couvrir, c’on ne voit son couvine ;
Feme ne chalt soz qui el se gise souvine ;
Feme est la riens el mont où il a plus rapine.
Feme par devant home plaint et soupire et tranble,
Et enble cuer et cors et chetel tot ensanble.
Ne li chaut de quel home el praingne, ce me sanble,
Quar feme est plus corant que cheval qui bien anble.
Fox est qui entor feme séjorne ne demeure :
Feme por decevoir plaint et soupire et pleure,
Et ses cheveus derront et sa chière deveure,
Et tost est rapaiée en mult petitet d’eure.
Mult est fox qui en femes a son coraige mis ;
Plus fox est se il prent itex femes en pris.
