Maz et confus ferme son huis :
Lors qui veut avoir pais, si l’a ;
Qui ne veut, si va par-delà.
Or vous dirai de son ostel,
Onques nus riches hon n’ot tel.
Li fondemenz est de concorde ;
La dame de Miséricorde
I estoit quant ele acorda
Le descort qu’Adans descorda,
Et qui nous a toz acordé
A l’acort au digne cors Dé,
Qui a, si com nous recordons,
En sa corde les .iij. cordons.
C’est la Trinité toute entière :
Cil sainz arbres et cele ente ière
En chiés Humilité la sage
Quant Diex prist en li herbrégage.
Lors porta l’ente fleur et fruit
Qui puis lessa enfer destruit.
Li sueil i sont de pascience :
Sages hom et de grant science
Fu cil qui ouvra tel ouvraingne.
La meson siet en une plaingne :
Si sont les paroiz d’amistié.
N’i esta pas de la moitié
Tant gent comme il i soloit estre,
Ainz vont le chemin à senestre.
Post et chevron et tref ensamble,
Si com je cuit et il me samble,
Sont d’une ouvrangne moult jolive.
Si apele-on le fust olive ;
Por ce le fist, je vous afie,
Page:Rutebeuf - Oeuvres complètes, recueillies par Jubinal, tome II, 1839.djvu/51
Le texte de cette page a été corrigé et est conforme au fac-similé.
44
LA VOIE DE PARADIS.
