ordinaire aux Hecatombes : Nous vismes passer quantité de riches Vases d’or, pour recevoir le sang des Victimes, & pour faire les libations : Nous vismes aussi porter les Foyers Sacrez pour brusler l’Encens, & les riches Couteaux qui devoient servir à esgorger ces Victimes, Tous les Sacrificateurs marchoient deux à deux, en leurs habits de ceremonie : & toutes choses enfin estoient prestes pour le Sacrifice : n’y manquant plus rien, que la Personne qui le devoit offrir. Je regardois toutes ces choses avec autant de plaisir qu’Artamene, lors que tout d’un coup, l’on entendit dire à plusieurs personnes, Voicy le Roy, voicy le Roy : & à ces mots, tout le Peuple se pressa des deux costez du Temple, pour laisser passer le Prince. Je vous advouë, Seigneur, que cette advanture me surprit un peu ; & que je fus bien fasché, de voir Artamene si prés de Ciaxare ; qui estoit venu de Pterie à Sinope ce jour là, pour faire ce Sacrifice. Cependant Artamene encore plus curieux qu’il n’avoit esté, s’avança malgré moy au premier rang, & se mit droit au passage du Prince. Un moment apres, les gardes se saisirent des Portes ; se mirent en haye au milieu du Temple ; & toute cette foule de Courtisans, qui marchent ordinairement devant les Rois, s’avança jusques à l’Autel. Artamene qui ne s’estoit preparé qu’à voir le Roy de Capadoce seulement, le vit alors entrer, appuyé sur le bras d’Aribée, qui estoit en faveur aupres de luy en ce temps là : Mais ô Dieux ! il le vit, accompagné de la Princesse Mandane sa fille ; qui certainement estoit la plus belle Personne qui sera jamais. Je ne la vy pas plustost paroistre, que je vy Artamene presser ceux qui le touchoient, & quitter le jeune Estranger
