II
Extraict des Mémoires et instructions par Monseigneur de Rochebonne, sénéchal et governeur du pays de Vellay et ressortz de ladicte seneschaussée et envoyés à Monseigneur de Dampville, mareschal de France, governeur et lieutenant-général pour sa Majesté en Languedoc et par ledit seigneur répondues et appoinctées au sieur du Besset……… comme s’en suyt.
Mais despuys ledict Cheylard ayant esté saisi comme aussi Désany, à demy lieue de lad. ville, par les rebelles, ne distant que de St-Agrépve, d’une lieue, est de besoing augmenter le nombre des soldatz, a quoy, s’il plaict audit sieur de Damville, le Sr de Rochebonne pourvoyra.
Comme aussi ayant mis garnison au château et lieu de Fay cinquante soldatz, à Devesset dix soldatz, comme ayant esté lesdits forts, les aultres troubles, tenus par les rebelles comme estans scytués entre iceuls rebelles et aux montagnes, seroit de besoing augmenter ledict nombre de soldatz ne le pouvant envitailher sans grand force et scorte (escorte), et lesquels rebelles de la montagne s’estant emparés du chasteau nommé Mongyraud à la faveur duquel et avec le secours qu’ilz ont du Cheylar et Désany qui sont, en chacune ville de cinq à six cens arquebuziers et aux limites du pays de Vellay, n’y ayant, comme dessus est dict, que une lieue, et ayant saisy le chasteau de Montgiraud dans ledict pays, faisant des courses, voleryes, massacres et aultres actes d’hostilité ; pour lesquels empescher ledict sieur de Rochebonne auroyt faict assembler les gens des Estatz dudit pays de Vellay ausquelz ayant faict remonstrer ce dessus les priant luy bailher