ſe qu’ils impetrerent ſort aiſement. Adonc ayant le chois d’en prendre vn, à fin de rendre la choſe plus plaiſante & agreable à leur Mahomet, ils s’en võt jetter ſur noſtre frere, qui de vray pouuoit eſtre la victime la plus ſacrée de la trouppe, pour eſtre conſacrée à la diuine Majeſté, auquel, comme il prioit en la proüe, & profeſſoit haut & clair ſa foy & la religion Catholique, d’vn reuers de cimeterre, ils luy auallent la teſte de deſſus les eſpaules, apres le Soleil couché, qui auoit haſté ſa carriere, pour ne voir vne ſi cruelle barbarie. O que moriatur anima mea morte iuſtorum, & fiant nouiſſima mea horum ſimilia. Que pleuſt-il à noſtre bon Dieu, que je meure de la mort des juſtes, & que les dernieres periodes de ma vie ſoient ſemblables à celles là. De Goa, la veille de Noel, 1607.
