à tour de roole, par les colonelz des bandes tant françoises qu’estrangères, un capitaine pour garder que les soldats ne se desbandent, lesquelz, faisant autrement, encoureront le chastiment des dictz capitaines, suivant ce quy en sera ordonné par les dicts marechaux de camp, afin que, quand la punition aura esté faicte, serve d’exemple à tous les autres. Et pour empescher et pourveoir que les dictz soldatz n’aillent vaganz et prennent occasion de se desbander, les dicts capitaines donneront ordre que les regimentz et compaignies soient advertiz de leurs logis, et les y feront adresser avec leur suitte et bagage.
Et d’autant qu’il advient souvent confusion et desordre pour estre les dictz soldatz meslez parmy le bagage, et que advenant une soudaine occasion ils ne se peuvent ranger et s’assembler promptement avec leurs compaignies, il est enjoinct très expressement à tous colonelz de gens de pied quy n’ayent à souffrir que aucuns de leurs soldatz demeurent avec le dict bagage ; et que à ceste fin ils y en commettent quelques uns pour les conduire, et où il en seroit trouvé d’autres que ceux que les dictz capitaines y auront mis après la publication de l’ordonnance, ils seront pendus et estranglez sans aucune forme de procez, pour donner exemple aux autres.
Que les armes et chevaulx des hommes d’armes et archez quy seront portez et conduictz par leurs valletz devant ou après leur bagage seront confisquez, et les ditz hommes d’armes cassez de leur dicte compaignie.
