greant le ciel et la terre de son mauvais destin, qui vouloit qu’à faute de cent escus elle vist trainer honteusement son frère en galères. Ces lamentations estoient secondées de celles du mary, lequel adjoustoit qu’il contribueroit volontiers tous ses moyens, et engageroit jusques à sa casaque pour rachepter une personne que l’alliance luy avoit rendu si proche. Moy, qui suis de mon naturel plus sensible aux maux d’autruy qu’aux miens propres, me laissay toucher à la pitié et promis de faire prester la somme moyennant que le mary entrast solidairement en obligation. La condition fust acceptée et les cent escus delivrez par mon procureur, qui me prestoit le nom. Je n’oubliay pas de stipuler tacitement avec la demanderesse une rente quotidienne sur ses basses marches pour l’interest de la somme ; et, m’estant retiré pour ce soir sans coup ferir, il me tarda qu’il ne fust jour pour aller lever mon usure. Mais, dieux ! que devins-je le lendemain, quand, heurtant à la porte de cest honorable hostel, je feus adverty par les voisins que la locatairesse à laquelle j’avois affaire avoit demenagé dès les cinq heures du matin, et que j’eus aprins, de plus, que celuy qui prenoit qualité d’archer et de mary n’estoit mie ny l’un ny l’autre, ains un chirurgien ou empyrique qui luy avoit fait suer la verolle ? Ce fust lors qu’il tinst à peu que ma constance ne fist nauffrage. Toutesfois, je me roidis contre mon affliction, et me resolus d’atendre de pied ferme l’issue de mon procez. Le pis fust quand, destitué de toutes sortes de moyens, je me vis en mesme temps frustré de l’assistance de mon advocat, lequel, imitant la statue de Memnon,
