Lors commanda à Drove, son frere, l’evesque de Mez, que il feist venir devant lui touz les chambellens du palais et les menistres et vout que touz si jouel et son meuble, en quelque chose que ce fust, fussent escrit ; fust en or, fust en corones, ou en pierres, ou en armes, en livres, en vaissiaus, en dras de soie, ou en aornemenz d’eglises. Pour ce le fesoit, que il voloit savoir que il porroit doner aus eglises et aus povres et aus menistres du palais ; et au derrenier, que il porroit lessier à ses ii fiuz, Lothaire et Challe. A Lothaire dona sa corone et s’espée, par tel condition que il portast foi et loiauté à sa fame Judith et à Challe son frere, et que il li laissast en pais sa partie du roiaume tele comme il li avoit donée devant les barons du palais, si comme il meismes estoit tenuz à tenir et à garantir par son sairement.
Après ce que il ot ensi ordené de toutes ses choses, il rendi grâces à Dieu de ce que riens propre ne li demoroit. Ses freres, li evesques Droves et li autre prelat, qui present estoient, regrâcioient Dieu de ce que il veoient la fin du saint empereor en tele devotion
